.....لسه نِفسك.....
....................
لسه نِفسك
تِرمي نَفسَك
جوه نَفسَك
والحنين عمال
ينافسك
نِفسك الأيام
تصالحك
ولا تلقي
حد حاسك
تلقي قلب
بيشتريك
تلقي عينك
فيها ضحكه
ولسه شايفه
ألف سِكه
تلقي إيد في
عز خوفك
وسط كل الكون
تشوفك
وقت ضعفك
واقفه بتطبطب
عليك
لسه عايز
ترمي نفسك
فوق كتافك
تشكي م الهم
اللي داسك
تدفن الأحزان
في قلبك
تشتكي بُعدك
لقُربك
تشكي من
بَعْضَك لبَعْضَك
تلقي قلب
يحس بيك
لسه عايش
ع الحنين
والذكريات
لسه فاكر
رحلة العُمر
اللي فات
بس قلبك م الأسي
فرهد ومات
حِلمك اللي
حِلمت بيه
واللي عشت
العُمر كله
بتبني فيه
فجأه راح
من بين إديك
الدموع مابقتش
كافيه
والمعافره عايزه
عافيه
وانت مش قادر
تعافر
الزمن سابك
وسافر
مش زمانك
مش مكانك
بعد عِزك
كُله هانك
فا اكتم الأحزان
في نَفْسك
أوعي مره
تذل نَفْسك
ولا يشمت حد فيك
ارمي حِمْلَك
ع اللي باقي
اللي مابيخْلِف ظنون
هو بس معاه تلاقي
أمرُه مابين كاف ونون
ذِل نَفْسَك بين إديه
وادعي واتوسل إليه
تلقي ذُلك عنده عز
حُكم مش ممكن يشذ
هو أرحم بينا منا
هو اللي معاه أمانٌا
واللي لو تبكي وتتعب
واللي لما تخاف وتهرب
تلقي حِصنُه قام حاميك
تلقي حِصنُه قام حاميك
...............................
عبد الفتاح احمد الغنيمي
