همســــــــــــــــــــــــــــــــــــة حــــــــــــــــــــزن
فات الزمن
والعمر راح
زى الثوانى وانقضى
مابين انين
ساعة فراق
أو موت حبيب
وبين حنين
ساعة لقا
وبين ذهول
ساعة قضا
فات الزمن
وآدينا عايشين فى الحياة
عرفنا فيها ناس كتير
مابين عدو
وبين صديق
واللى كان عامل صديق
بس انكشف فى وقت ضيق
حتى اختك او اخوك
لو جاموسة هايحلبوك
واسمك الأخ الكبير
حتى الأخوة بالتمن
فات الزمن
سألت عينى بتبكى ليه ؟
قالت وايه ماابكيش عليه ؟
وكل شيئ بقى بالفلوس
حتى النفوس وبكام جنيه
تقدر تبيع وتشتري
حبة نفاق
وحبوب رياء
وادفع يابيه
وكل شيئ
وله تمن
فات الزمن
قلبى حزين على اللى كان .....وانا مهما اكون
عمري ماابيع حتى اللى باع ...ولايوم أخون
ابويا علمنى الأصول
وازاي أصون
واللى انجرح قلبى انا.
وازاي يهون
والبيعة كانت بالمزاد
واللى اشترى
ارخص تمن
آه يازمن
آه يازمن
يوسف الخواجه
