أكد إبراهيم حسن، مدير منتخب مصر، أن الجهاز الفني حرص على تحفيز اللاعبين قبل مواجهة أستراليا بعرض فيديو يضم احتفالات الجماهير المصرية والعربية خلال مباريات المنتخب في كأس العالم، مشددًا على أن الهدف كان تذكير اللاعبين بحجم المسؤولية تجاه الشعب المصري.
وقال إبراهيم حسن: "قبل ماتش أستراليا جمعت كل فيديوهات فرحة الشعب المصري في كل محافظات مصر وفي كل بلاد العالم خلال الماتشات اللي فاتت، وعملت فيديو طويل جدًا وشغلته في المحاضرة الأخيرة للاعيبة، عشان يبقى حافز ليهم إنهم ينزلوا يكسبوا ويفرحوا الناس دي تاني."
وأضاف: "إحنا معملناش حاجة، دي أقل حاجة نقدمها لمصر وللشعب المصري الجميل. المصريين هنا في كندا وأمريكا عاملين ملحمة، وعايزين نعمل قد كده 100 مرة لأن مصر تستاهل مننا كتير. بشكر اللاعيبة والجهاز الفني وكل المنظومة، هما أبطال ورجالة، واستحملوا ظروفًا صعبة جدًا في التدريبات والمباريات، لكن لسه مطلوب منهم كتير."
وأشار إلى أن منتخب مصر يلعب من أجل رفع اسم الوطن، قائلًا: "إحنا هنا في خدمة مصر، لازم نرفع علم مصر، ومينفعش متضحيش بكل حاجة وكل نقطة عرق عشان تعمل حاجة لمصر."
كما أشاد بالدعم العربي للمنتخب، موضحًا: "العالم العربي كله فرحان زي مصر، شوفت فرحة غير عادية على السوشيال ميديا، وهي دي الوحدة العربية، وبوجّه التحية لكل إخواتنا العرب."
وعن محمد صلاح، قال: "صلاح بيلاقي نفسه مع حسام حسن ومع منتخب مصر، وبيقدم نسخة مختلفة تمامًا، وخلال السنتين ونص اللي فاتوا كان متفوق وبيؤدي في أكتر من مركز، لأن حسام حسن عايز له الخير وعايزه يبقى في أفضل مستوى."
وكشف إبراهيم حسن عن الرسالة التي يوجهها الجهاز الفني للاعبين قبل كل مباراة، قائلاً: "من أول يوم قولنا للاعيبة شيلوا من دماغكم فكرة إننا هنرجع مصر بعد 3 ماتشات، مش هتحصل. وكل مباراة بنقول إحنا قاعدين، ومحدش بيجمع حاجته. بنطلب منهم يقاتلوا بقلب جامد لأنهم بيلعبوا باسم مصر وبيكتبوا تاريخ، ولسه معملناش حاجة."
واختتم تصريحاته برسالة قوية قبل مواجهة الأرجنتين، قائلاً: "مواجهة ميسي؟ إحنا مش شايفينه، إحنا شايفين نفسنا بس، شايفين منتخب مصر. متبصش لمين اللي قدامك، انزل قاتل في الملعب، إحنا عندنا محمد صلاح، وإحنا عندنا 26 ميسي."
