⚡️الحساسية مش ضعف... دي لغة تانية محتاجة ترجمة
المشكلة مش في إحساسك، لكن في طريقة تعاملك معاه
_عمرك سمعت "انت بتتأثر زيادة قوى" ؟ أو
_كلمة اتقالت لك وفضلت ترن في دماغك أسبوع؟ أو
_موقف صغير بوظ يومك كله والناس شايفاه "عادي"؟
مع الوقت بتبدأ تصدق إن فيك حاجة غلط... وإن مشاعرك "متضخمة زيادة عن اللزوم".
بس الحقيقة؟ مفيش حاجة غلط فيك.
الحكاية ان :
في ناس مولودة بجهاز عصبي مختلف السينسور بتاعة عالى شوية بيلقط التفاصيل اللي محدش بياخد باله منها. بيسمع نبرة الصوت، بيتعب من الزحمة والنور، وبتحس بمشاعر اللي حواليك كأنها مشاعرك.
دي اسمها #الحساسية المرتفعة# . ودي مش مرض ولا عيب. دي سِمة.
طب ليه بنتعب أوي كده؟
الوجع الحقيقى بيبدأ لما نكبر في مكان مش فاهم طبيعتنا.
كل ما تقول "أنا متضايق" تسمع: "كبري دماغك" "مافيش داعي للدراما" "كل الناس بتعدي بيه"
ومع التكرار بندخل في دايرة مرهقة: نضطر
نكتم مشاعرنا → نضغط أكتر → ننفجر → نلوم نفسنا → نرجع نكتم تاني
وبنبدأ نسأل السؤال الغلط: "ليه أنا كده؟"
بدل ما تسأل: "أنا محتاج إيه دلوقتي؟" اهتم تعرف الحل
وانا جيبالك عدة حلول
تحمي قلبك الحساس
نعمل إيه؟ 5 أدوات والمطلوب تتعلم تحمي نفسك من غير ما تقفلي قلبك.
*1. سمّي إحساسك قبل ما هو يسميك*
أول ما تتوجع فى موقف ، قف ثانية واسأل: "أنا حاسس بإيه؟"
غضب؟ خذلان؟ خوف؟ إحراج؟
مجرد التسمية بتقلل حدة الإحساس للنصف.لأن المخ بيهدى لما يفهم "آه ده اسمه قلق" بدل ما يفضل سايح في بعضه.
2. قاعدة الـ 24 ساعة
أي موقف وجعك أو أي رد عايزة ترد عليه ... ادي لنفسك 24 ساعة.
اكتب، اتمشي، فضفض مع حد أمان.
بعد يوم غالباً هتلاقي الإحساس هدى، والقرار بقى أوضح. مش كل حاجة لازم رد فوري.
*3. ضع فلتر للناس والكلام*
مش كل الناس تستحق النسخة العميقة منك.
من حقك تقول: "مش قادرة أتكلم في ده دلوقتي"
ومن حقك تبعد عن اللي بيقلل من إحساسك.
دي مش أنانية. دي حدود بتحمي طاقتك.
*4. افصل بين "اللي حصل" و "تفسيرك ليه"*
مثال: زميلك رد عليكي ناشف.
*اللي حصل*: قال جملة ناشفة.
*تفسيرك*: "أكيد بيكرهني"
اسأل نفسك: "هل في احتمال تاني؟ يمكن مستعجل؟ مضغوط؟"
مش عشان تبرري لحد، بس عشان ما تشيليش حمل مش بتاعك....
*5. فضّي كوبايتك كل يوم*
الحساسين كوبايتهم بتتملي بسرعة: دوشة، أخبار، مشاعر ناس.
لازم كل يوم وقت 10 دقايق للتفريغ : كتابة، صلاة، رياضة، رسم، قعدة لوحدك من غير موبايل.
لو ما فضيتيش، أقل نقطة هتغرق الكوباية.
*أهم تغيير: طريقة كلامك مع نفسك*
بدل "أنا حساس بزيادة"
قول "أنا بحس بعمق... وبتعلم أحمي نفسي"
بدل "يارتني ما كنت كده"
قول"دي قوتي، بس محتاج أتعلم أستخدمها صح"
*الخلاصة*
الحساسية مش لعنة. دي سوبر باور بس من غير كتالوج.
لما تتعلم تحتوي مشاعرك بدل ما تخجل منها...
هتتحول من حاجة بتستنزفك، لقدرة بتخليكي تشوفي الناس والحياة بعمق محدش شايفه.
وهتفضل بنفس قلبك... بس بدرع يحميك...دمتم بخير..د/منى فاروق إمام
استشارى الصحة النفسية والارشاد الاسرى
