أكد أسطورة الكرة المصرية محمد أبو تريكة أن منتخب مصر لا يمثل نفسه فقط، بل يحمل مسؤولية تمثيل الوطن العربي والقارة الأفريقية، مشددًا على ضرورة التعامل بعقلانية أمام أستراليا في مواجهة دور الـ32 من كأس العالم.
وقال أبو تريكة:
"مصر أم الدنيا وكل الناس بتحبنا، ودي مسؤولية، منتخب مصر مبيمثلش نفسه بس، بيمثل كل العرب وبيمثل القارة الأفريقية، فإحنا النهاردة قدامنا فرصة ذهبية. العقل زينة، الروح والحماس حلو لكن العقل يكسب، ولازم تستفز منتخب أستراليا كرويًا، بأنك تستحوذ وتلعب بسرعة، لأنه متعود على الاندفاع والانقضاض، فلازم تهدّيه ونلعب كورتنا وعلى الأرض، وإن شاء الله عندنا المقدرة نكسب أستراليا."
وأضاف:
"التحضير لماتش مصر وأنا محلل حاجة مختلفة، مصر حاجة تانية، أنا بعيش قلق اللعيب، وعشان كده مكنتش بحب أبقى موجود في الماتشات دي، لأن فيها قلق وتوتر، والله يكون في عون اللعيبة، لكن المفروض إن التوتر ده بيروح منهم مع صفارة البداية."
ووجّه أبو تريكة رسالة خاصة إلى عمر مرموش، قائلًا:
"ماتش النهاردة ده ماتش مرموش، وعايز أقوله: إحنا مش بنلاعب أستراليا النهاردة يا مرموش، إحنا بنلاعب نيوكاسل يا مرموش."
كما شدد على أهمية دور البدلاء في اللقاء، قائلًا:
"النهاردة ماتش دكة، لازم يا زيزو تبقى مركز، النهاردة لو وصلنا أشواط إضافية التغييرات هيبقى ليها دور كبير في حسم المباراة، فلازم كل اللعيبة على الدكة تبقى مركزة."
