أكد محمد صلاح، قائد منتخب مصر، أنه خاض مواجهة أستراليا في دور الـ32 من كأس العالم 2026 وهو يعاني من الإصابة، مشددًا على أن ما قدمه كان من أجل مصر، وأن الإنجاز التاريخي يُحسب لجميع اللاعبين.
وقال صلاح: "النهاردة يوم من أجمل أيام حياتي، حاولت أقدم كل حاجة عندي، كنت بلعب وأنا مصاب، وعملت ده عشان البلد وعشان مصر، قدرنا نكتب التاريخ، وأنا فخور جدًا بالإنجاز ده وفخور جدًا باللعيبة، ومش عايز أنسب أي فضل لنفسي، اللعيبة دي هما اللي كتبوا التاريخ النهاردة."
وتحدث قائد الفراعنة عن الانتقادات التي يتعرض لها عبر مواقع التواصل الاجتماعي، قائلًا: "أنا خلاص كبرت على حتة إني أنساق ورا السوشيال ميديا، وأصله بيدي اللي عنده ومبيديش اللي عنده. أنا راجل بناتي على وش جواز، مبوضحش لحد حاجة، أنا عارف قيمة نفسي كويس، واللاعيبة عارفة قيمتي كويس، والناس كلها بتشوف بيتعاملوا معايا إزاي، وأنا بحاول على قد ما أقدر أساعدهم وأريحهم، أهم حاجة علاقتي كويسة باللاعيبة، ويوم ما أمشي يقولوا ده كان إنسان كويس."
وعن أحلامه في المرحلة الحالية، أوضح صلاح: "مفيش حلم معين بحلم بيه دلوقتي، الحاجة الوحيدة اللي بفكر فيها دايمًا إني أكون اديت للناس أمل إنهم يقدروا يوصلوا لمكانة كبيرة، وبالأخص الأطفال. مش شرط يكون لاعب كورة، ممكن دكتور أو أي حد في مجاله يقول الشخص ده ادانا أمل في وقت الدنيا كانت صعبة."
واختتم قائد المنتخب تصريحاته مؤكدًا حرصه على نقل خبراته للأجيال الجديدة، قائلاً: "بحاول أنقل خبراتي لعمر مرموش وحمزة عبد الكريم، وأي حد بيكلمني في حاجة بقوله رأيي وإيه اللي ممكن يساعده. حلمي إني أبص ورا وأقول عملت سيرة كويسة، والناس اتعلمت مني وكان عندهم أمل يحققوا حاجة كويسة."
