بطلت أخاف
رجعت لي بعد سنين عجاف
قالت خلاص بطلت أخاف
هبدأ حياتي من جديد
وهعيش معاك ان شاءالله حاف
هودع الماضي الأليم
بهمومه أو حتى بنعيم
انا بك حياتي تستقيم
وبين ضلوعك الطواف
تعبت من عيشت الجحيم
واللي حصل لي من سنين
تعبت من عصر الحريم
هرجع لصورتي على الغلاف
أصل الدموع كسرت عيوني
ضاع الهوى وناديت خدوني
ونسيت معاه شكلي ولوني
حتى الوجع لو قال عواف
سنين حياتي راحت بلاش
سيبت الهوى وقلت ماجاش
خلاص معاك مايهمناش
القلب تعبه من اللي شاف
عشقاق ولسه العشق باقي
معاك حياتي خلاص هلاقي
يرجع غرامي وكبريائي
انا إيه غصبني على الطواف
هرجع لروحي واشتياقي
وهخضر الأرض الشراقي
مابين شمسي أومسائي
الحب ساكن على الضفاف
هنسى اللي كان منه السبب
ولاهقلب في الحطب
نار الغرام حب وأدب
قلبين ولو زعلوا. لطاف
افتح ضلوعك ضمني
عشقاك وقلبك حبني
في الكون وبس تهمني
هصرخ واقول بطلت اخاف
بيتك مكانك إدخلي
مارحلتي ولا يوم ترحلي
على الشط واقف من زمان
علشان حياتي تحرري
......... ( شعر )..........
عبدالله السايح
