أنا مشتاق
انا مشتاق لبراحي في حدك
واغزل توب من نور على قدك
واجـعل كـل حيـاتك عيـــــد
وارسم ورد يفوح على خدك
انا مشتاق
أنا مشــــتاق لحــنان الضــمه
زي النـــور مايشـق الضـــلمه
أنا محــــتاج للقــلب الدافـي
حلمي يوافي في حضنك يامه
انا مشتاق
زي النــور انا طــاير بيـكي
زي النسـمه وســارح فيـكي
انا فرحــان بوجـودك جنبي
إوعـي تخـبي عني عينيكي
انا مشتاق
انا مشــتاقلك وانتـي معايا
وانتي النسمه وماليه هوايا
لما باغمـض عيـني عليـكي
باحلم بيكي ويحلى غنايا
انا مشتاق
انا مشتاق وماليني الشوق
لما باشوفك بالي يروق
وافرح زي غزال متحني
أعزف لحني بخفه وذوق
انا مشتاق
انا مشتاق وماليش اعذار
ياللي عيونك نور في الدار
صـــوتك فجــــر وهل نداه
جـابلي معــاه النـــور دوار
انا مشتاق
حنى وزيدي صبي وعيدي
نبض وريدي في قلبك عيدي
قلبي يســاع اوجاعك يامه
زي ماسـاع قلـبك تنهــيدي
انا مشتاق
دعوة قلبك دهبي ومــاسي
روح ياحبيب قلبي وإحساسي
تحلى الدنيا في ضي عينيك
ويلين ليك القلــــــب الآسي
وانا مشتاق
على رجليكى انا كنت بانام
لمـس إيديكي يلـــــم حـمام
لم حفـــيدي وقبـــله ولادي
أجمل شادي في حجرك نام
انا مشتاق
لما كبرت ودعـــــبل رمشي
عرفت إزاي عليتي ف عشي
كنتي تداري الدمعه ف قلبك
لاجل ماشوفك يضحك وشي
انا مشتاق
وادعي يارب تطول أيامك
وابني قصايد من إلهامك
كل الشعرا تغير من حرفي
يكمل وصفي ويعلى مقامك
انا مشتاق
انا مشتاق والشوق حراق
بعدك يامه انا قولي نفاق
كل الحب عشانك شيلته
قلبي قفلته وعهدي وثاق
انا مشتاق
بقلم / معوض حلمي
الشهير بالفلاح الفصيح
الشرقية - مصر
