بخاف عليك
********
بقيت أخاف على قلبي منَّك
وأخاف عليك منِّي أنَا
بخاف عليك يوم أظلمك
أو أجور عليك
وأخاف البعد يجرحني
والجرح ينزف أوجاعي
أجري عليك، واشكي إليك
وأنا ليَّا مين في الدنيا غيرك
أروحله وأنا شايله جراحي
تبكي عيوني وتشكيله؟
يهون عليك أشوف الويل أنا
ف بُعدك؟
وأتوه في الدنيا من بَعدك؟
ومين غيرك هيمسح دمعَة
ف عيوني؟
ومين غيرك من الدنيا دي
يحميني؟
بتسألني بكايا دا ليه؟
وغيرتي عليك
متعرفشي بتعمل إيه
في قلبي الغيرة وجنونها؟
ونارها لمَّا تكويني!
وأنا بسأل
سؤال لكن محيَّرني:
في قلبك قد إيه ليَّا
غرام وحنين وحنيَّه؟
تردّ تقول: أنا عاشق
وعشقي جنون
يا أحلى عيون ملايكيَّه
يا ريت يصدق هوى قلبك
يكون صافي
يا ريت تبقى على عهدك
أمين ع العهد ده وافي
يا ريت، والحب ده غالي
مهونش عليك!
تخبِّيني برموشها عنيك
تاخدني ف حضنك الدافي
وتسقيني عسل شافي
يا كل آمالي وحياتي
بخاف عليك
بِـقـلم الشاعرة المصرية
دعـاء محمّد إسماعيل 
