محبتنيش
****
بقلمي : دعاء محمد إسماعيل
وآه يا ليلي آه... اسمعوا يا ناس حكايتي
محبتنيش... أنا قولتها والدنيا شايفه وساكته ليه؟
صوتي صرخ.. كسرت جدار الصمت صرخاته
نزعت ستار الغيم .. وفضحت ع الملأ كدبك
وانت زي خيال الضل.. صامت ..قلبك حجر
ما رق لحالي يوم ولا لان !
وآه يا ليلي آه...
حبيت تماثيلك ..وخضعت لغرورك،
صدقت أوهامك سنين !
ووقفت على بابك، النظره بشحتها،
وبتمناها تبقى نظرتين
وآه ياليلي.. وآه ياعين
أنا اللي شيِّبت الأحبَّه في الهوى ودابو
دلوقتي بستجدي الحنين!
يمشي إليك القلب بعذابه ..والخطوه قدّ البعاد
المُرّ بين قلبين!
وانت حافظ كل دمعة حايره نزلت من عينيَّا
بسّ امتى طبطبت إيدك عليَّا،؟
وانت عارف إن منك علتي ومنك دوايا
بس قلبك قاسي وقسوته واصله النهايه
والبخل طبعك م البدايه
بسّ أنا خدعتني صورتك
زيّ ما بتخدعنا بالصوره المرايا !
قوللي إمتى جيتني في مرّه تواسيني ؟!
قوللي إمتى قولتلي حقك عليَّا؟!
قولها واخلص... إعترف
إنك بظلمك خليتلي عيشتي مرار
انك ما حبتنيش ولا لحظه، ولا دقت يوم طعم الغرام
واني سامحتك ألف مرّه، وكل مرّه أضعف وأرجع في القرار
وانت ياما دوست قلبي، وزدت جرحه والآلام
حبيتك ..؟
أيوه يا قدري ونصيبي ف دنيتي
حبيتك ..؟ أيوه يا ناري ونعيمي وجنتي
وانت حبك كان لذاتك إنت بس،
يمكن أنا ف عنيك مجرد صوره حلوه
وف خيالك يعني ذكرى
امتى كان وجعك غيابي؟
ولَّا بانت فرحتك لحظة حضوري؟
حاسَّه إني سطر في حكاية غرامك
وانك شايفني واحده من بين معجبينك!
آه يا ليلي آه... فهمت اللعبة خلاص
اللي ما يعرفش الحب، مستحيل يديه لناس
شارياه وباقيه ع العهود
من النهارده قلبي للهوى الموعود تابوت
فيه دفنت بإيدي كل الذكريات
م انهارده حعيش لقلبي..
أمَّا حبك م انهارده اعتبره مات!
