وقال زيكو: "مكنتش عامل حسابي أروح منتخب مصر، رغم إني كنت عامل موسم كبير وكنت هداف بيراميدز في كل البطولات، لكن الناس مكانتش مركزة معايا. الوحيد اللي كان متابعني هو الكابتن حسام حسن، ولولاه مكنتش هبقى موجود هنا".
وأضاف: "لو فضلت أشكره سنين مش هوفيه حقه، لأنه غيّر حياتي 180 درجة، وكان ممكن الموسم يخلص ومحدش يحس بيا".
وعن حياته خارج الملعب، أوضح زيكو: "أنا باجي قبل التمرين بساعتين أدخل الجيم، وبعد التمرين أرجع البيت، حياتي كلها عبارة عن التمرين ومراتي وابني، ومبخرجش غير نادر جدًا".
وكشف لاعب المنتخب عن لحظة علمه بانضمامه للقائمة، قائلًا: "كنت ماشي مع أخويا، ولقيت اتصال بيقولي إن اسمي موجود في قائمة الـ27 لاعبًا. ركنت العربية على جنب وقعدت أعيط من الفرحة، وبعدها سمعت كلام إن ممكن أخرج من القائمة، لكن أنا بحب التحديات".
وتحدث زيكو عن أول حديث جمعه بحسام حسن داخل معسكر المنتخب، قائلًا: "قالي: أنت مش جاي هنا صدفة، أنا متابعك من بدري، وكان فيه حاجات محتاج تطورها، ولما اشتغلت عليها بقيت موجود معانا. وقال لي كمان: متشيلش هم أي حاجة، انزل العب وسيب الباقي عليا".
وأشار إلى أن هذه الثقة منحته دافعًا كبيرًا، خاصة بعدما فوجئ بأن المدرب كان يفكر في إشراكه مبكرًا خلال مباراة روسيا، مؤكدًا أنه أصبح مطالبًا برد هذه الثقة داخل الملعب.
واختتم زيكو تصريحاته بالإشادة بالجماهير المصرية، قائلًا: "كنت بشوف فيديوهات الجمهور، وحسيت إننا بنلعب في استاد القاهرة مش في كندا. الناس سابت شغلها وجت تساندنا، وكان لازم نفرحهم. منتخب مصر منتخب كبير، وإن شاء الله نكمل المشوار ونحقق إنجازات غير مسبوقة".
