أكد محمد السيد تمسكه بالاستمرار داخل القلعة البيضاء، مشددًا على أن الاحتراف الخارجي هو خياره الوحيد في حال الرحيل عن النادي.
وقال: "لن ألعب في مصر إلا لنادي الزمالك. أنا سعيد ومرتاح جدًا في النادي، ولو تلقيت عرضًا من أي نادٍ جماهيري آخر فلن أوافق، وهدفي الاحتراف فقط."
وتحدث عن انتقادات جماهير الزمالك له، قائلًا: "من حق الجمهور يهاجمني، لأنهم كانوا شايفين حاجة معينة، وفي الوقت ده كان فيه أمور هما مش عارفينها بشكل كويس. أنا كنت مقدرهم جدًا، وهما فوق دماغي، ولو مكنوش بيحبوني مكنوش هاجموني."
وأضاف: "الفرق بين جمهور الزمالك وأي جمهور تاني إن جمهورنا بيقدر اللاعب ويدعمه في الفترات الصعبة، وأنا بحب أشوف جمهور الزمالك حاضر بكثرة في المباريات لأني بحب ألعب تحت ضغط، ولو النتيجة كانت سيئة فمن الطبيعي نتعرض للهجوم، وده أمر مش بنقلق منه."
وعن أبرز درس تعلمه، قال: "أكبر غلطة اتعلمت منها كانت ركلة جزاء إنبي، واتعلمت بعدها إني متسرعش ومعملش تاكلينج، وأخدت نصايح من حسام عبدالمجيد بعد الموقف ده."
وكشف موقفًا طريفًا داخل الفريق، قائلًا: "الكابتن عبدالناصر محمد خصم مني 200 ألف جنيه لأني جبت حلاق في يوم مينفعش أجيبه فيه، وجبته في أوضة محمد إبراهيم، واتخصم من كل واحد فينا 200 ألف جنيه."
واختتم تصريحاته بالإشادة بعبدالله السعيد، قائلًا: "عبدالله السعيد قدوتي، ونفسي أبقى زيه في يوم من الأيام. مرتاح وأنا بلعب معاه، وهو فاهمني، ودايمًا بيتدرب معايا، وبينصحنا إن الرد يكون في الملعب مش على السوشيال ميديا."
