أكد مصطفى شوبير، حارس مرمى منتخب مصر، سعادته الكبيرة بعد التأهل التاريخي إلى دور الـ32 من كأس العالم 2026، مشيرًا إلى أن الهدف الآن هو مواصلة المشوار وتحقيق إنجاز جديد أمام أستراليا.
"الحمد لله، ربنا كرمنا. تعبنا جدًا وكنا عايزين نفرح الشعب المصري، والحمد لله قدرنا نعمل كده. معنديش كلام أقوله لأن الواحد عاطفي شوية دلوقتي، إن شاء الله نحتفل النهارده، ومن بكرة نركز في المباراة الجاية أمام أستراليا، وإن شاء الله نحقق إنجازًا جديدًا."
وأضاف: "كنا دارسين منتخب إيران كويس جدًا، وعارفين إنه خصم قوي خاصة في الكرات العالية. آخر خمس دقائق كانوا صعبين جدًا، خصوصًا إننا مكنّاش عارفين نتائج المباريات التانية، وكان هدفنا نصعد أول المجموعة، لكن تدبير ربنا أفضل، والحمد لله على التأهل."
وعن تصديه لركلة الجزاء، قال: "كنت أتمنى أقدم أكتر وأحافظ على شباكنا نظيفة، وفيه حاجات هنشتغل عليها أكتر، لكن الحمد لله حاولت أعمل اللي عليا."
وتابع: "الفضل أولًا وأخيرًا لله سبحانه وتعالى. إحنا بنشتغل كويس جدًا مع محلل الأداء، وبندرس كل المنافسين، ونعرف كل لاعب بيسدد إزاي، والحمد لله ده نتيجة تعب ومجهود، ومن أول يوم هدفنا نوصل لأبعد نقطة، وإن شاء الله مباراة أستراليا متكونش آخر محطة."
وأشاد شوبير بزملائه، قائلًا: "فخور جدًا بالإنجاز اللي تحقق، وكل اللعيبة كانوا رجالة وساهموا فيه. ياسر إبراهيم أنقذ كرة في آخر دقيقة وكان بطل، وكل الفريق قاتل رغم الإصابات والإجهاد، والحمد لله أهم حاجة إننا تأهلنا."
كما تحدث عن حراس المنتخب، مؤكدًا: "كل الحراس الموجودين معايا حراس كبار، وبتشرف إني وسطهم، والكابتن محمد الشناوي تاريخ كبير، وأنا سعيد جدًا بالتواجد مع المجموعة دي."
واختتم تصريحاته: "حققنا إنجازًا تاريخيًا بالتأهل لأول مرة من دور المجموعات في كأس العالم، وإحنا فخورون جدًا بده. هنحتفل الليلة، ومن الغد هنبدأ دراسة منتخب أستراليا، لأنه منتخب قوي، ووصوله لكأس العالم أكبر دليل على ذلك، وإن شاء الله نقدر نتأهل للدور التالي." 🇪🇬🏆
