أنا جيت أقول الشعر
قلبي منصفنيش
حروفي نار قادت
وأوراقي تتخبَّى
سكوتي أبرك لي
من قول ميرفعنيش
وأدور أنا ف ساقية
واتذل لمحبة..
ألاقيش كلام طيب
ف جرابك الدرويش
يجلي بكايا وبسمتي
حبة تجيب حبة!
ده أنا شعري حاوي وغاوي
ميملكوش العيش
وجرابه له مطالب
ع الغالي تتربى
يا سيدنا يا درويش
الكل قال معييش
ووشوش تواسي بغلبها
لكن الكفوف طبَّة!
دي الناس ورق سلوفان
مزيون ونافخ ريش
كلام يحلّي ملام
بس النفوس شبّة
